Ministru Prezidénsia Konsellu Ministrus, Fidelis Manuel Leite Magalhães hatete, Konsellu Ministru halo aprovasaun mós ba projetu Dekretu-Lei, ne’ebé aprezenta husi Ministru Defeza, Filomeno da Paixão de Jesus, kona-ba Regulamentu Medalla Militár no Medalla Komemorativa Defeza no F-FDTL nian.
Diploma ida-ne’e ho ninia objetivu atu kria no regula kondisaun atribuisaun nian ba modalidade medalla militár sira ne’ebé destina atu fó prémiu ba servisu ho valor aas tebetebes ne’ebé hala’o ba FALITINL-Forsa Defeza Timor-Leste (F-FDTL) no ba Nasaun no mós halo distinsaun ba virtude importante ne’ebé hatudu iha servisu husi militár sira F-FDTL nian.
Tanba Medalla militár ne’e bele mós atribui ba militár estranjeiru no sivíl nasionál ka estranjeiru, iha situasaun ne’ebé prevee iha regulamentu ida-ne’e.
Iha Medalla militár ne’e inklui modalidade sira tuirmai ne’e: a) Valór militár; b) Krús Guerra; c) Servisu distintu sira; d) Méritu militár; e) F-FDTL; f) Komportamentu ezemplár; g) Komemorativa kampaña; no h) Komemorativa komisaun servisu espesiál sira. (*)