“Ohin ita ho delegasaun hosi Timor-Leste hodi partisipa iha oitavu Konferensia Ministerial Bali Process on People Smuggling, Trafficking in Person and Related Transnational Crime 2023 paralelu ho Senior Oficial Meeting (SOM), ba dala 18, hodi hasa’e konsiensia efetivu rejional nia kona-ba konsekuensia husi kontra bandu, traffiku ema no krime transnasional nian”, dehan Vise-Ministru Interior, Antonio Armindo, ne'ebé www.tempotimor.com asesu iha pajina ofisiál Servisu Relasõesn Públika, Kinta (09/02).
Konferensia refere, lidera husi Guvernu Austrália ho membru hamutuk 48-resin, inklui UNHCR, IOM, UNODC nomós nasaun membru observadór sira no organizasaun internasionais relevante, inklui mós grupu Ad Hoc, hodi rezolve kontra bandu espesifiku, tráfiku umanu no migrante irregular iha kada rejiaun
“Bali Process hanesan forum dialogu polítiku, fahe informasaun no kooperasaun prátiku atu ajuda rejiaun hodi rezolve dezafiu sira. Estratejia Bali proses ba kooperasaun inklui programa atividade servisu ba oin, ajuda Bali proses nia servisu atu implememnta prioridades tuir diresaun ministru sira nian", nia subliña.
Garante katak, ho forum ida ne’e bele kontribui ba kombate movimentu irregular ema nian iha rejiaun bali proses liu-liu iha Timor-Leste, hodi ajuda kualidade dezenvolvimentu, konsistente no enkuadramentu migrasaun nian sai di'ak liután.
“Iha tinan 2023 forum ida ne’e foka liu iha área kooperasaun prinsipal 8 maka hanesan, aplikasaun lei ne’ebé eziste entre nasaun membru, hametin kooperasaun ho partes interessadas, promove fahe informasaun públika entre nasaun membru, kontribui hodi kombate movimentu irregular ema nian hakat liu fronteira, ajuda kualiadade hodi haforsa Jestaun Fronteira, no ikus liu halo koordenasaun hodi hetan apoiu”, nia akresenta.
Entretantu konferensia internasional ne’e, Vise-Ministru António Armindo, hetan akompañamentu hosi Adjuntu Diretór Jerál Servisu Migrasaun, Inspetora Xefi Polísia, Adelaide da Rosa, Xefi VPU Nasionál, Inspetór Polísia Ricardo da Costa, nomós ofisiais investigasaun PNTL no Servisu Migrasaun. (*)