"Lori komandu komponente naval nia naran husu deskulpa ba inan no aman laivai, liuliu FC Laivai ho juventude laivai tomak, ha’u hakruuk ba ita boot sira. Asaun ne’ebé ha’u nia forsa sira halo ne’e la’os ordem komandu nian, maibé ne’e oknum ida rua ne’ebé hakarak mai estraga prestiju forsa nian no ami nunka hanorin ida ne’e ba ami nia forsa", dehan Komandante Komponente Naval, Komodoro Higino das Neves bainhira hasoru malu ho reprezentante jogador FC Laivai iha Quartel Jeneral Fatuhada, Segunda (18/12).

Tuir nia, FC laivai sira fuan boot banati tuir uluk sira terus subar falintil, tanba ne’e fiar-malu to’o mai hasoru malu hodi lakohi halo foer FDTL nia naran.

"Kopa naval ne’e eziste ho objetivu atu halibur juventude timor laran tomak hodi idaidak bele partisipa no atu kria relasaun amizade entre juventude sira hotu ho FFDTL sira", nia dehan.

Tanba kada tinan laiha problema, maibé tinan ida ne’e iha problema ituan tanba deit oknum ida rua ne’ebé la respeita komandu naval nia ordem i estraga prestizu Komponente Naval iha publiku.

"Maibé ha’u agradese ba laivai oan sira, tanba sira nafatin respeita no fiar komandu hodi ohin mai hasoru malu solusiona ba problema ida ne'e", nia esklarese.

Kopa ne’e naval realiza kada tinan, signifika naval mak atu asegura bainhira isidente ruma iha sira bele hakalma, la’os sira mak halo fali asaun.

"Tanba ne'e komandu sei la tolera no foti desizaun regirozu ba iha situasuan ida ne’e ultimatur mak nia asaun deskontroladu mak nia sei aruma nia farda", fó xamada.

Komandante komponente naval, simu ona informasaun katak, iha membru hamutuk na’in-5 mak deskonfia liman kona Domingos dos Santos iha kampu laran.

"Agora sei investiga hela atu haree, konforma informasaun hatete, iha rua ka to’o lima, mais ha’u seidauk hatene loloos, so investigasaun mak bele hatene, tanba ha’u labele jeneraliza ema hotu, iha balun bele tama no balun atu ba sori, maibé desizaun iha ona investigasaun, para depois haree”, nia hatete.

Bainhira ema ruma mak prepara mai iha F-FDT atu hafoer ka estraga forsas armadas nia naran mak sei simu konsekuensia.

Asaun membru F-FDTL husi komponente naval halo hasoru ofisial FC Laivai nian ne’e, bainhira ekipa rua hanesan FC Naval ho FC Laiva jogu kontra malu iha estadiu Dili hodi hadau manan na’in dahuluk, iha sabadu (16/12). (*)