"Ha’u rona katak Ángela Freitas ho Aitahan Matak iha dia 4 Setembru ne’e atu hatun PR Lú-Olo, ha’u husu ba Ángela, o mak hatun Prezidente, ou tali mak sa'e fali o,” dehan Lere iha Kurtel Jenerál F-FDTL Fatuhada, Segunda (31/08).
Lere realsa dehan, dia 4 mak Ángela Freitas ho António Aitahan Matak mak hakarak hatun PR Lú-Olo, lori tali futu no sama belar tiha.
"Dia 4 sira halo manifestasaun ha’u haruka futu Ángela, António Aitahan Matak mós sama belar hotu. Hatun ema seluk, joven sira hanesan Aniceto no Ministru foun sira ne'e bele hatun ba, mais ha’u nia katuas sira la hatun ho demonstrasaun, hatun ha’u haruka sama sira no ha’u responsabliza iha tribunál, tanba uluk funu o iha ne'ebé! Uma ne'e ami mak harii, agora o hakarak duni sai fali ami husi uma laran, o la'ós uma na'in tan, ha’u nia feto ka doben Ángela ne'e hanoin la dun loos ona karik,” Lere hatutan.
Funu na'in 24 anus ne'e dehan, Lider hanesan Kay Rala Xanana Gusmão, Taur Matan Ruak, Fransisco Guteres Lu-olo, Mari Alkatiri no Ramos Horta ema ida sei la hatun arbiru ho manifestasaun.
"Ne'e mak ha’u hateten, pudia ne'e loloos ita-nia governu la pudia hatama ona ema ida hanesan Ángela ne'e, iha Timor. Labele ona e labele simu ona nia iga Timor, biar nia Timor oan. Mas nia halo saida? krizi 2006 nia halo Alfredo mate e depois tuir tan mai Mauk Moruk mate tan, nia mak asesóra. Be agora halo tan ida ne'e, ha’u la husik kualker ema seja quem for, hatun ha’u nia maun sira ne'ebé ke uluk komanda funu, Dezde husi Maun Xanana Gusmão to'o Taur Matan Ruak, Lú-Olo, Mari Alkatiri, Ramos Horta, ema ida la hatun", Nia dehan.
Nia konsidera Ángela ho Aitahan Matak hanoin sala ona, tanba hakarak hataun fali Prezidente Repúblika Lú-Olo.
"Ema bulak mak ko'alia atu hatun Prezidente Republika, tanba PR ne'e tuir desizaun, la'ós naran foti de'it, PR ne’e orgaun Primeiru, ema primeiru másimu iha Timor mak nia, agora Ángela prepara ona ema ida atu troka nia ne'e kuitadu,” tenik Nia
Komandante ne’e, apela ba Ángela Freitas ho António Aitahan Matak katak hanoin atu hatun PR Lú-Olo ne'e kuidadu.
"Ha’u apela dala ida tan ba Ángela Freitas ho António Aitahan Matak imi kuidadu, di’ak liu katuas sira ne'e ita respeita no tane as sira, tanba sira mak ita ukun aan, tanba ne'e mak se imi mak book sira, ha’u haruka sama belar tiha imi,” jeneral fitun rua ne’e hakotu.