"Ohin (20/08) ita komemora tan dala ida ezisténsia Falintil ninian ba tinan 46. Primeiru lugar, fó ha'u-nia parabéns ba sobrevivente Falintil sira ne'ebé que sei moris, biar atravesa situasaun ida ne'ebé que difísil, iha tempu naruk, la'o tuir dalan ida ne'ebé naruk, e ninia maluk rihun ba rihun mate tutuir dalan, e ba sira ne'ebé qur mate ona, ita hotu nia onra, gloria ba sira, nu'udár eroi ba ita-nia rain ba ita-nia nasaun, atu ohin loron sai nasaun ida ne'ebé que soberanu e independente”, hatete Lere Anan Timur, hafoin serimónia Aniversáriu Falintil ba dala-46, iha Kuartel Jenerál, Fatuhada, sesta (20/08).

Durante hahú funu, Falintil iha nia elementu kuaze hamutuk rihun-resin 20 to'o 30, maibé  hafoin luta tinan 24 nia laran, liuhusi levantamentu iha tinan 1982 no 1983, mak kompleta efetivu Falintil ninian sobrevivente hamutuk 100-resin, ka másimu na'in-200.

"Agora ativu ne'e, númeru ha'u ladun hatene ona mais, reforma ne'e 15, e sira ne'ebé hela mós sei lubuk ida, mas sira hothotu iha ona tinan ba reforma, dala-ruma tinan ida ne'e, ou tinan oin, ami sira ne'e ba ona reforma, ami entrega ba jerasaun foun atubele kaer instituisaun ida ne'e. Importante mak ida ne'e, hanesan bainbain ita dehan ne'e, dehan katak jerasaun tuan, jerasaun foinsa'e”, afirma nia.

Iha konseitu jerasaun tuan no jerasaun foun ne'e, nia koloka mós ba mentalidade, tanba sé jerasaun tuan, dala-ruma mentalidade foun, no jerasaun foun, dala-ruma mentalidade tuan mós bele iha.

"Ne'e mak ha'u hanoin katak presiza mentailidade, espiritu patriotízmu, nasionalízmu hodi servi. Ida ne'e mak importante liu”, dehan nia. (*)