“Hodikalan ita-nia PNTL, detein sidadaun na’in-10, tanba Suspeitu na’in-10 ne'e komete krime, artigu 211 arma proibidu, konjuga ho lei númeru 5/2017 rejime juridiku relativu prátika de Arte Marsiais, Rituál, Arma Branka no Rama Ambon”, dehan Komadante Polisia Nasionál Timor-Leste (PNTL), Munisipiu Dili, Superintendente Xefe Henrique da Costa, iha Komandu Munisípiu Dili, Kaikoli, kuarta (09/03).
PNTL detein suspeitu na’in-10 ne'e, tanba polísia intelijénsia, fó informasaun mai iha komandu katak sei iha grupu balun ne'ebé organiza malu, atu ataka malu iha kalan ho oras ne'ebé planeia tiha ona.
Tanba ne’e, tuku 8 kalan, patrolla Unidade Espesiál Polísia (UEP), forsa rezerva ho mós patrolla Dom Aleixo ninia, halo hela atividade rutina iha aldeia anin fuik, suku Madohi, Postu Administrativu Dom Aleixo ninia hodi halo prevensaun ba krime.
“Entaun ita-nia Polísia sira halo kedas movimentu iha ne'ebá, bainhira sira halo movimentu ne'ebá sira rona barollu ida iha armajen nia laran, e Polísia sira ba observa no iha observasaun ne'e hetan suspeitu na’in-13, mak iha hela armajen laran no sira lori sasán kroat, hanesan sikat iha kanotak, no balun sira kaer iha liman, atu halo asaun ruma”,
Husi suspeitu 13 ne'e lori mai iha eskuadra Dom Aleixo ninia, halo identifikasaun na’in-3 haruka fila, tanba sira na’in-tolu la envolve asaun krime nia laran.
Nune’e suspeitu na’in-10 mak lori mai iha Komandu Munisípiu Dili hodi halo prosesu kontinuasaun.
Husi suspeitu na’in-10 ne'e, iha na’in-2 ho naran inisiál JG, PC, mak organiza nia kolega na’in-8 seluk hodi prepara sasán kroat sira, ho objetivu atu hasoru suspeitu seluk ne'ebé antes iha loron (07/03) ne'e aslatu uluk sira hodi estraga sira-nia sasán no tuda sira-nia uma.
Husi suspeitu na’in-10 ne'e mós, iha na’in-1 ho naran inisiál JG, mak envolve iha grupu Arte Marsiál Ikatak Kera Sakti (IKS) maibé na’in 9 seluk la envolve iha Grupu Arte Marsiál ruma.
Entretantu sasán kroat ne'ebé suspeitu sira uza atu halo krime mak hanesan, katana maubeka 4, katana Xina nia taa naan 1, samurai 1, fiska borasa 5, berlindus 280, fatuk ki’ik uza tau ba borasa tiru ne'e hamutuk 250, rolamentu 20 no besikanu nia rohan tuku belar 1.
Kazu ne'e, rejistu iha Polísia ho NUC.0121/2022 DICNR, ho númeru prosesu, NUC krime 0124/2022 DICNR hodi hein Prosesu primeiru interogatoriu ba tribunál. (*)