Hafoin Timor-Leste konfirmadu iha suspeitu ida pozitivu Covid-19, públiku hahú pániku no balun hahú lansa informasaun iha média sosiál. Entre informasaun hirak ne'e, iha balun ne'ebé lansa sem justifika nia kredibilidade no tendénsia hoax ka informasaun falsu.
Haree ba kestaun ne'e, Ministériu Saúde apela ba públiku tomak atu hein informasaun ofisiál husi parte komponente relasiona ho ameasa Covid-19 ne'ebé daudaun ne'e Timor-Leste hasoru.
"Husu ba públiku atu hein informasaun ofisiál husi Ministériu Saúde no husu ba komunidade tomak nia kolaborasaun hodi bele hamutuk luta kontra COVID-19," haktuir iha pájina Ministériu Saúde ne'ebé www.tempotimor.com asesu, Segunda (23/3).
Iha karta ne'e, hato'o mós komunidade atu labele julga uluk pesoál saúde, maibé buka hatene uluk fonte loloos nian. Ministériu Saúde kompromete atu halo investigasaun ba hahalok ne'e molok foti desizaun.
Entertantu, iha sorin seluk Sekretáriu Estadu Komunikasaun Sosiál rasik mós foti medida hodi redús informasaun hoax, nune'e sei servisu ho orgaun komunikasaun seluk sei inklui Ministériu Saúde no Organizaun Mundiál Saúde (OMS) hodi autualiza regulamentu informasaun kona-ba pandemia Covid-19.
"Governu sei kolabora besik ho OMS hodi fó sai informasaun loloos no kredivel ba públiku tomak, liuliu kanal sira hanesan televizaun, radio, no pájina ofisiál sira seluk," hakerek karta SEKomS ne'ebé www.tempotimor.com asesu, Segunda (23/3).
Iha karta ne'e, husu mós atu sidadaun hotu atu halo tuir padraun prevensaun Covid-19 ne'ebé Ministériu Saúde no OMS fó sai.
Entertantu, dadaun ne'e kuaze maioria utilizadór média sosiál lansa informasaun hoax hanesan account balun ne'ebé hatete atu labele panik bainhira aviaun no elikópteru rega ai-moruk prevensaun Covid-19, iha Dili laran, iha tuku 00:00 kalan. (*)