DILI – Ahi konsege han mutuk uma (gudang) ida iha área Metiaut, tanba deskonfia ahi sirkuitu.
Segundu komandante operasuan Bombeiros Dili, Bruno da Costa Maga lhães hatete, parte bombeiros simu informasaun hosi Delta Base telefone ba númeru emerjensia serbisu nian mak hodi desloka ba fatin akontesementu.
“Ita mak tenke iha konsiensia hodi loke dalan, tanba ne’e serbisu emerjensia nian. Ami sai hosi ne’eba mai to’o ne’e kuaje minutu 15, tanba iha tempu meudia movimentu maka’as tebes. Ita nia vitura ne’ebé mak barak tebtebes, sira lahatene serbisu emerjensia nian mak saida,” hatete komandante Bruno ba Jornalista sira iha Metiaut – Dili, Segunda (19/03).
Nia hatutan, bombeiros konsege hamate tiha ahi hodi labele da’et tan ba uma sira seluk, maibé sasan barak mak mutuk tiha ona, tanba ahi han maka’as tebes.
“Kuandu ami loke ahi no lian emerjensia nian, sira mós la loke dalan. Tanba ne’e mak hakarak husu ba motorista sira hotu katak bainhira serin ne’e lian, sira mós tenke loke dalan para ami mós to’o lalais fatin hodi salva populasaun sira ka fatin ne’ebé mak ahi han ne’e,” nia hatutan.
Iha fatin hanesan uma nain . . . Neves de Sousa katak, iha dadersan nia ba serbisu, no foin hatene informasaun kona – bá ahi han nia uma liuhósi nia oan feto, maibé ladun iha informasaun klean kona – bá motivu hosi akontesementu ne’e.
“Ha’u mós dadersan ha’u ba tiha serbisu, ha’u lahatene akontesementu iha ne’e. To’o ne’eba mak ha’u nia oan feto telefone ba dehan ahi han mutuk uma iha ne’e,” nia esplika.
Uma ne’ebé ahi han, nu’udar uma (gundang) tau sasan ba hadia sasan kareta – motor nian. Sasan balun sai mutuk tiha, no balun konsege salva tiha. (Oki)
