Tempotimor (Díli) – Ministra Solidariedade Sosiál no Inkluzaun (MSSI), Armanda Berta hanoin presiza kria lei ida ne'ebé forte, ba feto ka mane foinsae sira ne'ebé inresponsabilidade, hodi estraga kosok-oan ka bebé.
"Atetude hanesan ne'e, tuir loloos labele. Tanba, hatudu ba públiku katak feto Timor-Leste laiha dignidade. Tan ne'e, presiza kria lei ida ne'ebé forte hodi fó sansaun. Tanba ne'e, la'ós atetude ne'ebé di'ak," dehan MSSI Armanda Berta iha Palásiu Governu, Kuarta (07/08/2019).
Berta mós husu ba públiku liuliu familia sira atu tau atensaun ba oan feto no mane foinsa'e sira. "Timoroan sira tenke hatudu atetude ne'ebé di'ak, liuliu husi parte uma laran, inan-aman sira tenke tau atensaun ba oan sira, para bele sees husi hahalok hanesan ne'e," dehan Armanda.
Nia promete, Governu sei kontinua servisu hamutuk ho uma mahon sira, para haree ba problema hirak ne'e. Maibé, nia dehan, la signifika harii uma mahon para haruka ema halo beibeik hahalok soe bebé.
Sansaun refere, tuir Berta, la'ós ba feto de'it. Maibé fó mós ba mane. Nia dehan, atetude ne'e la'os feto de'it mak halo. Mane mós fó kontribusaun. Tanba, atu sai ema ida, feto ho mane sempre kompleta malu.
To'o agora, maiz um menus dala haat ona, ema inresponsabilidade sira ne'ebé soe bebé iha Kapital Dili.
Iha loron 04 Juñu 2019 akontese ema soe bebé iha Lahane Osidentál. Iha loron 24 Jullu 2019 akontese ema sunu no soe bebé iha Cruz Boot, Semiteriu Santa Cruz. Iha loron 02 Agusto 2019 akontese ema soe bebé iha Lixu fatin, Taibessi. No antes ne'e mos iha informasaun ema so'e bebe iha fatin seluk iha Dili laran.