Tuir informasaun ne'ebé www.tempotimor.com asesu iha pájina Ministériu Finansas iha loron (26/02) katak, ezekusaun aas liu mak iha liñas ministeriais ne’ebé ezekuta ona tokon US$66,9 hosi orsamentu alokadu biliaun US$1,2.
Tuir kedan ho ajénsia autónomas ho nia ezekusaun atinji ona tokon US$15,2 hosi orsamentu alokadu tokon US$218,3. Autoridade Munisípais ezekuta ona tokon US$3,4 hosi orsamentu alokadu tokon US$81,3.
Enkuantu RAEOA ezekuta ona besik tokon US$1 hosi orsamentu alokadu tokon US$84. Fundu Dezenvolvimentu Kapitál Umanu ezekuta ona rihun US$700 hosi orsamentu alokadu tokon US$17,8.
To’o iha inísiu fulan-fevereiru tinan 2023, ministériu finansas foti ona osan husi fundu minarai ho montante tokon US$300 hosi totál orsamentu biliaun US$1,3 ne’ebé parlamentu nasionál aprova liuhosi lei OJE 2023.
Tinan 2022, governu foti osan husi fundu minarai hamutuk biliaun US$1,4 ka 90% hosi totál biliaun US$1,55 ne’ebé parlamentu nasionál aprova liuhosi lei OJE retifikativu 2022.
Montante biliaun US$1,55 ne’e esklui ona fundu kombatetentes libertasaun nasionál biliaun US$1 ne’ebé tinan kotuk tribunál rekursus deklara inkonstitusionál no automatikamente eliminadu hosi kontas públikas. (*)