“Apoiu ida-ne’e ita halo tiha ona, entaun ita kontinua de’it. Ne’e la’ós atividade foun ida tanba ita investe tiha ona ekipamentu iha ne’ebá entaun tempu kuandu sira halo eleisaun ita sempre partisipa”, dehan nia hafoin finaliza enkontru semanál ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairo Pite, kinta (18/08).
Tanba hanesan públiku tomak hatene, apoiu ida-ne'e uluk halo tiha ona iha tinan 2018, haruka tiha ona grupu ida ba no foin daudaun haruka tan grupu ida ba nomós antes ida-ne’e grupu ida ba prepara kondisaun tékniku hotu hodi ajuda sira.
Tanba ne'e, enkontru semenál ho Prezidente Repúblika, ko’alia mós asuntu ida-ne'e kona-ba parte Governu haruka tiha ona ekipa ida ba Guine-Bissau no sira konsege fila tiha ona hodi halo aprezentasaun iha reuniaun Konsellu Ministru (KM) horseik.
Mesmu nune'e Governu sei haruka filafali ekipa ida hodi halo preparativu no apoiu tékniku, atu nune’e sira-nia resensiamentu no preparativu tékniku sira seluk hodi fasilita prosesu eleisaun ho susesu.
Ba atividade ida-ne'e, Governu prevee orsamentu kuaze millaun $1 hodi kooresponde ba despeza ekipa ho apoiu tékniku sira. (*)