"Rezultadu votasaun afavór 41, kontra 6 no abstensaun 15, nune'e proposta orsamentu ba RAEOA, pasa", dehan Prezidente PN, Aniceto Longuinhos Guterres Lopes, hafoin anunsia rezultadu votasaun liuhusi debate esesialidade ba proposta OJE 2023 iha PN, kinta (17/11).
Durante debate, Deputadu sira husi Bankada CNRT aprezenta proposta haat atu redus alokasaun orsamentu ba RAEOA, maibé la hetan admisaun husi meza PN.
"Tanba, proposta sira la halo sentidu ida hasai osan hosi RAEOA, la hela iha ne'e ka mai fali nasionál no bainhira aprova proposta ne'e mós RAEOA bele buka fali reseita hosi fatin seluk", Aniceto esplika.
Deputada Bankada CNRT, Maria Barreto, hatete, nia-parte aprezenta proposta tolu ba meza, tanba bazea ba audiénsia liu-liu ezekusaun orsamentu iha setór asuntu sosiál iha RAEOA kuaze ezekusaun laiha no konsidera laiha ezekusaun orsamentu hodi ezekuta ba nesesidade povu nian.
"Iha audiénsia, esplikasaun orsamentu barak tau iha gabinete prezidente, ho ida-ne'e ami hato'o proposta duké ita aloka orsamentu barak ba RAEOA, nune'e proposta husu redusaun. Espera maluk deputadu sira apoiu proposta la admite hodi re-abre fali iha disksaun", nia dehan.
Deputada Bankada CNRT, Maria Fernanda Lay, mos reforsa, nia parte rekore ba plenaria, tanba iha esplikasaun durante audiénsia informasaun no relatóriu laiha esplikasaun liu-liu iha Fundu Espesiál Dezenvolvimentu (FED) hanesan iha lei so iha investimentu mak ema kria.
Mesmu proponte sira rekore proposta haat ba plenária, maibé hetan de'it rezultadu votasaun a-favór 24, kontra 34 no abstensaun 4, nune'e labele pasa.
Enkuantu Parlamentu mos halo votasaun ba kada tabela Xl-despeza sub-setór RAEOA, ho klasifikasaun orgánika no estruturada por programa ho votu a-favór 43, kontra tolu no abstensaun 16 no halo mós votasaun proposta lei OJE 2023 ba artigu 2 alínea k, votu a-favór 42 kontra 4 no abstensaun 16.
Iha livru orsamentál elementu informativu kona-ba fundu espesiál dezenvolvimentu RAEOA ho nia investimentu iha 2023 haktuir kona-ba sumáriu despeza RAEOA iha 2023 ho totál tetu orsamentu hamutuk millaun US$120 desagrega ba Gabinete Prezidente Autoridade (PA), ho Adjuntu Prezidente Autoridade ba Reforsu Institusional, Adjunta Prezidente Autoridade ba Asuntu Sosiál no Sekretária Rejional hitu iha RAEOA no ZEESM.
Totál despeza RAEOA ba 2023 hamutuk millaun US$120 ne'ebé kompostu hosi despeza normál millaun US$84 (70%) no millaun US$36 (30%) ne'ebé konsidera nu'udar Fundu Espesiál Dezenvolvimentu. (*)