Prokuradór Jerál Repúblika, José Ximenes hateten, analiza situasaun globál iha Timor-Leste, buat ne'ebé deteta no fatin sira ne'ebé risku para atu analiza ka kombate.
"Ami tau iha primeiru institusaun ne'ebé risku mak Ministériu Finansas, Diresaun Jerál Alfándega," dehan nia, iha Palásiu Prezidensiál, Bairru-Pité, Segunda (9/3).
Nia akresenta, Ministériu Públiku haree katak Diresaun Alfándega risku tebes tanba sira mak kontrola sasán tama-sai. Nune'e, sasán barak mak tama ilegál mai Timor utrapassa mós husi Alfándega.
"Kareta barak ke utrapasa husi fronteira mai Timor, até antes mai Timor númeru matríkula mós sira iha hotu ona," dehan José.
Tuir nia, la'ós maioria funsionáriu Alfándega la di'ak, iha balun ne'ebé dedika aan tinan ba tinan ona no presiza promove diviza mas iha balun ke problema.
José esplika, Diresaun Alfándega iha risku boot ne'ebé bele estraga ekonomia país Timor-Leste.
Entretantu, kazu ne'ebé envolve husi funsionáriu Alfadega no rejista iha Ministériu Públiku mak hanesan, kontra bandu, trafiku de influensia, korupsaun no ikus mak brankamentus kapital. (*)