Serimónia hatuur hikas meza Prezidente PN, iha Sesta (4/9) hahú ho lisan no taka ho misa. Maski nune’e, serimónia ne’e la hetan prezensa másimu husi deputadu bankada CNRT ho PD.
Ne’e duni, tuir lia na’in sei fó impaktu iha futuru tanba seidauk iha entendementu entre deputadu sira. Koordenadór lian na’in, Eugénio Sarmento hateten, iha futuru sei fó impaktu tanba deputadu sira iha Parlamentu Nasionál seidauk iha entendementu.
"Haree husi perspetiva lian na’in ami hotu-hotu, ne'e fó impaktu ba futuru tanba ita nafatin seidauk entende malu ho di'ak," dehan nia, iha Parlamentu Nasionál, Sesta (4/9).
Serimónia lisan ne'e rasik lian na'in sira ne'ebé hola parte mak mai reprezentante lian na’in husi lorosa'e na'in rua, rai klaran na’in rua no loromonu na'in rua, maibé husi lia na'in sira mós bolu tan lian na'in seluk, nune'e lian na'in sanulu resin. (*)