Tuir informasaun ne’ebé www.tempotimor.com, asesu iha pájina média PNTL, segunda (21/08/2023) katak, Segundu Komandante Jerál PNTL, Komisáriu Pedro Belo hatete, sira dun direta ba fatin akontesimentu ne’e atu haree hamutuk oinsá hari’i Postu Polísia ida ba komunidade hodi fó seguransa atu moris hakmatek.
Iha konflitu ne’ebé akontese iha loron domingu (20/0/2023) ema na’in-ida hetan kanek tanba hetan ta no komunidade nia uma barak estragu, tanba hetan tuda no komunidade balu evakua husi sira-nia hela fatin no vítima balun oras ne’e hamutuk atu ko’alia ba malu.
“Ami haree hamutuk oinsá fó solusaun ba problema hirak ne’e la’ós de’it husi aldeia no suku ida ne’e maibé ami mós husu ba lidernsa nasionál sira iha resposabilidade ba problema ne’ebé maka oras ne’e daudaun ita hasoru”, Komisáriu Pedro iha sede Suku Vila-Verde Mataduro Dili, segunda (21/08/2023).
Nia hatete, ema hotu hakarak atu populasaun tenke moris hakmatek iha independénsia nia laran ema hotu tenke goza nia liberdade, labele iha grupu ida atu ba impede fali ema seluk nia liverdade hodi asalta ema no ema labele la’o ba mai ho seguru.
Tanba ne’e estadu labele tolera grupu ida ne’ebé kria instabilidade iha Dili laran, PNTLsei foti medida ida atu hasoru sira, di’ak liu sira hasoru seguransa duke hasoru komunidade ne’ebé maka laiha forsa.
Hafoin identifika fatin atu hari’i Postu Polísia Segundu Komandante Jerál akompaña husi Komandante Komandu Munisípiu Dili no Komandante UEP ba sede suku Vila-Verde hodi halo sorumutu ho joventude no komunidade hirak ne’ebe maka sai vítima ba komfrontu ne’e.
Iha diálogu ne’e, Komandante PNTL munisípiu Dili, Superintendente Xefe Orlando Gomes no Superintendente Damião Correia husu ba komunidade sira atu kontribui hamutuk ho autoridade seguransa hodi garante estabilidade no seguransa iha komunidade nia leet.
“Ita mai atu ko’alia ba malu, la’ós atu kondena no julga malu. Ita halo reflesaun atu nune’e labele mosu tan problema no hadi’a ita-nia situasaun tanba ami prekupa ho sitasaun seguransa”, afirma Komandante Munisípiu Dili.
Nune’e, joventude no komunidade hirak ne’ebé maka partisipa iha diálogu ne’e prekupa ho ejisténsia organizasaun Arte Marsiál no Arte Rituál iha sira-nia aldeia no kria konflitu nune’e komunidade sira sai vítima ba sira-nia attitude. Tanba ne’e husu ba autoridade seguransa atu foti medidas hasoru grupu hirak ne’e hodi bele hakotu problema ne’ebé akontese no halo komunidade moris la hakamtek.
Diálogu komunitária ne’e lidera husi Komandante PNTL munisípiu Dili akompaña husi Komandante UEP, Administradór Postu Vera-Cruz, Xefe Suku Vila-Verde, no partisipa husi responsavel arte marsiál no Arte Rituál, Joventude, Vítima no komunidade sira. (*)