Primeiru Ministru, Kayrala Xanan Gusmão hatete, membru PNTL no F-FDTL halo juramentu hodi loiál no kompremetidu atu la involve iha GAM, GAR no Partidu Politiku, nune’e bele servi de’it ba povu no nasaun Timor-Leste ho neutru no imparsialidade.

"Serimonia ida ne’e hodi muda hahalok iha ita nia sosiedade nia laran, maske juramentu hanesan ne'e hala’o tiha ona iha tinan 2009, maibé tanba la kumpri, nune’e hala’o hikas iha loron istoriku 07 Dezembru 2023 “Dia da Memoria” okupasaun Indonezia mai Timor-Leste iha tinan 1975", dehan PM Xanana hafoin prejidi juramentu iha Palasiu Governu, kinta (7/12).

Membru F-FDTL hamutuk na’in-833 ne’ebé ohin tuir juramentu ne’e kompostu husi unidade Sentru Instrusaun Komandante Nicolau Lobato(CICNL, sigla Portugues) na’in-75, Unidade Apoiu Servisu (UAS) na’in-101, Componente Terestre (CT) na’in-300, Componente Naval (CN) na’in-226, Unidade Espesial (UE) na’in-39, Polisia Militar (PM) na’in-48, Quartel Jeneral Fatuhada (QJ) na’in-44.

Membru PNTL hamutuk na’in-282 ne’ebé kompotu husi, Unidade Espesial Polisia (UEP), Batallaun Ordem Publika (BOP), Departamentu Tránzitu Seguransa Rodoviariu Nasional (DTSRN).

Membru hirak ne'e mai husi organizasaun arte marsiál Persaudaraan Setia Hati Terate (PSHT), Ikatan Kera Sakti (IKS) no Kmanek Oan Rai Klran (KORK) inklui arte rituál 77 no Kolimau 2000.

Serimonia Juramentu ne’e, prejidi husi Primeiru Ministru, Kayrala Xanana Gusmão akompaña husi Komandante Jerál PNTL Komisáriu Jerál Polísia Henrique da Costa no Xefe Estadu Maior F-FDTL Tenente Jeneral Falur Rate Laek.

Alende ne’e, PM Xanana mós sei buka tuir nafatin PNTL, F-FDTL, inklui funsionáriu no professores sira ne'ebé involve iha GAM no GAR.

“Hau sei tuir nafatin imi no haree imi nia hahalok no sei la permite Polísia, F-FDTL, Professor no Funsionáriu tuir Arte Marsiais no Arte Rituais”. (*)