Tuir informasaun ne’ebé www.tempotimor.com, asesu husi pájina PNTL, sesta (22/09/2023) katak, iha ninia introdusaun, Diretúr Justisa no Disiplina, Superintendente Xefe Polísia Justinho Menezes hatete,0 sorumutu ne’e hamutuk atu ko’alia kona-ba Vizaun no Misaun hanesan parte justisa no disiplina ninian.

“Objetivu prinsipal reuniaun ida-ne’e, primeiru hakarak konvida ita-bo’ot sira iha área Justisa no Disiplina atu mai iha fatin ida-ne’e hodi koñese malu, atubele apoiu servisu ba futuru di’ak liután hodi haree asuntu disiplina ninian, objetivu segundu mak atu fó koñesimentu área prosesuál kona-ba justisa no disiplina ninian tanba iha mudansa ba Dekretu-lei Disiplina aumezmu Lei Orgánika PNTL nian”, esplika Diretúr Justisa no Disiplina ne’e.

Superintendente Xefe Polísia ne’e salient, objetivu terseiru mak atu hametin amizade no unidade entre sesaun iha área justisa ninian atu nune’e karik iha insidente ka kazu sira ne’ebé akontese iha munisípiu ka Komandu, iha mós únidu hodi fó kontribui no apoiu aselera servisu liliu iha parte disiplina.

“Iha sorumutu ohin nian sei iha aprezentasaun husi sesaun haat ne’ebé mak eziste iha Diresaun Justisa no Disiplina hodi hato’o sira-nia esperiénsia tuir Lei legál sira atu ita halo diskusaun, iha mós diversus balun, karik orsida iha dúvida bele hato’o, atu iha loron ida-ne’e ita iha netik buka’e ida, tanba ha’u haree kazu barak mak prosesu ne’e tarde, segundu sei iha Gabinete Asesória Jurídiku sei aprezenta kona-ba Lei sira, ita-nia kna’ar ne’e bazeia ba artigu saida, sei esplika lala’ok sistema mekanizmu, oinsá ita koordena, komunika”, afirma Superintendente Xefe Polísia ne’e.

Informasaun kona-ba estatístika kona-ba kazu sira ne’ebé iha durante ne’e no rejistu ka prosesu liuhusi Diresaun Justisa no Disiplina hahú husi fulan-janeiru to’o loron 18 Setembru 2023 hamutuk 68 kazu. Kazu ne’ebé remata ona ninia prosesu hamutuk 37 kazu, sei iha prosesu nia laran hamutuk 31 kazu. Ba munisípiu sira ne’ebé rejistu prosesu kazu disiplina ho totál kazu hamutuk 61. Pena Represaun hamutuk kazu 19, Pena Suspensaun hamutuk kazu 8, Pena Demisaun kazu 3, Arkivamentu hamutuk kazu 10 no Pendente kazu 2, pendente iha Tribunál hamutuk kazu 11 no sei hala’o hela prosesu hamutuk 20.

Iha fatin hanesan, Komandante Komandu Administrasaun, Superintendente Xefe Polísia Natersia Martins, hanesan reprezentante Komandante Jerál iha sorumutu ne’e hatete, orientasaun ne’ebé hato’o husi Komandante Jerál iha-ne’e atu enkoraja membru hotu hodi bele fó idea ruma liuhusi enkontru ida-ne’e bele responde duni ezijénsia sira ne’ebé mak sai ona objetivu prinsipál ba enkontru ida ohin.

“Hakarak apresia ba Diretór Diresaun Justisa no Disiplina ba inisiativa hodi bele halibur Xefe Sesaun sira hotu iha fatin ida-ne’e atubele ko’alia kona-ba Lei foun Disiplina, Lei Orgánika foun ba ita-nia koñesimentu hodi nune’e bele fó apoiu ba ita-boot sira-nia servisu hodi rezolve situasaun sira ne’ebé kabe ba Disiplina PNTL ninian”, haktuir Komandante Komandu Administrasaun PNTL ne’e.

Superintendente Xefe Polísia hatutan ema hotu hatene katak Governu aprova ona Lei sira ne’ebé vigora iha instituisaun PNTL, mezmu halo hela revizaun ba Lei ne’e rasik, nia prosesu ikus mai sei iha aprovasaun hafoin to’o mai iha instituisaun PNTL hodi implementa.

Tanba buat sira ne’e halo hodi bele kontrola individu hotu ne’ebé mak reintegra iha sombriña instituisaun PNTL nian hodi assume responsabilidade hodi bele responde misaun sira ne’ebé mak Estadu fó ba instituisuan PNTL liuhusi Konstituisaun 147. (*)