"Ha’u sei PM la permite ita boot sira tama iha grupu sira ne'e, se imi tama iha grupu sira ne’e imi nia diviza la vale ona, sira ne’ebé pertense iha grupu sira ne’e afinal la'os sidadaun Timor nia, tanba sira obedese liu regra sira ne’ebé GAR no GAM iha signifika imi halakon valor nasaun ne’ebé fakar ruin no raan ba ", dehan Xanana hafoin prejidi juramentu iha palasiu governu, Kinta (7/12).
Membru F-FDTL no PNTL tama iha GAR no GAM, atu kria de’it dezarmonia, fahe-malu iha sosiedade nia leet, tanba PNTL no F-FDTL mak lutu ba nasaun, maibé se lutu nasaun mak iha uluk oin signifika rai ne’ebé ema mate rihun ba rihun ne’e la iha valor.
"Aat liu mak atu kesi sabuk ba halo juramentu ho bandeira mera putih, signifika bandeira mera puti mak komanda iha ulun, ita nia bandeira ne’ebé ema mate rihun ba rihun la vale", dehan Xanana.
Nune'e PM Xanana sei buka tuir nafatin atu hatene no haree membru PNTL no F-FDTL ne’ebé inklina aan iha GAR no GAM.
Xanana fó ezemplu, oan sona fali nia aman, mane foun oho nia banin, ne’e la’os buat seluk, maibé ida-idak tuir arte marsiál no arte ritu’al ne’ebé la hanesan, ne'e signifika valores família, sarani no valores kulturais lakon.
"Tanba ne’e liu husi juramentu ne’ebé imi halo hodi hasees aan husi GAR no GAM ne’e, ha’u sei nafatin buka tuir atu haree ita boot sira iha loialidade duni ba iha juramentu ne’e ka lae". (*)
